NUTK-İ ŞERÎF
Ey merd-i meydân-ı hakîkat ver haber ankâ nedir
Ol lâ-mekânın kâfına vâkıf olan yektâ nedir
Efvâc ile bin şân olan emvâc-ı bî-gâyet iken
Zâhirle bâtın bahrına girdâb olan deryâ nedir
Şark ile garbı cem' eden ol âfitâb-ı bî-zevâl
Kimden tecellî eyledi mazhar olan esmâ nedir
Bezm-i hakîkatden nasîb aldınsa gerçekden eğer
Mescûd-i kerrûbî olan Âdem nedir Havvâ nedir
Tevhîd-i ef'âl ü sıfât ekber kerâmet Âdem'e
Mu'ciznümâ-yı 'âlemîn 'Îsâ nedir Mûsâ nedir
Bir katrede olmuş nihân deryâ-yı kesret görünen
Cümle nükûşu cem' eden ol nokta-i kübrâ nedir
Mahv-ı izâfet eyleyüp erdinse "bâ"dan noktaya
Ders-i ledünnî mektebinde "men 'aref"le "bâ" nedir
Çünki hicâb-ı vasl-ı Hakk sâlik olana "lâ" imiş
"Lâ"dan kinâye edilen ma'nâ nedir "illâ" nedir
Cennetleri seyreyledinse milk-i ma'nâda eğer
Her semtini gark eyleyen ol kâmet-i tûbâ nedir
Mi'râca tecrîd deminde sen bî-cihet erdin ise
Ednâ nedir a'lâ nedir hem sırr-ı "mâ evhâ" nedir
Hüdhüd Süleyman rehberi mûr ile hikmet neşr eden
Mülkünde hükmüne sebeb ol hâtem-i imzâ nedir
Rükn-i bekâbillâh ile beyt-i fenâfillâh ile
Vahdetnişîn-i kibriyâda kubbe-i hadrâ nedir
Kur'ân-ı tenzîlî ile tekvîni buldunsa eğer
Bahr-i rumûz-i Fâtiha ile "Elif-Lâm-Râ" nedir
Sâliklere dünyâ nikâb 'ukbâ hicâb olmuş iken
Vahdet mehiyle ref' olan zulmetdeki ma'nâ nedir
İhrâm zebh ile tavâf u sa'y seb'a-i erkân ile
Esmâ yolunda vâdî-i sahrâ nedir deryâ nedir
Sâmî yüzünü ol edüp birde karâr etmiş ise
'Aynında gayna erişen insân-ı müstesnâ nedir
Şeyh Abdurrahmân Sâmî Saruhânî
Kaddesallahu Sırrahu'l-Âlî