NUTK-İ ŞERÎF
Gencîne olan diller vîrânedir 'âlemde
Meczûb-i cemâl-i Hakk bîgânedir 'âlemde
Zencîr-i reh-i 'aşka merbût olan ehl-i dil
Âzâde irâdetden dîvânedir 'âlemde
Gün gibi kemâl ehli nûr ile nazardan dûr
Gevher gibi mestûr-i 'umrânedir 'âlemde
Seylâbe-i fânîye mâiller olur esfel
Nîsân-ı füyûz ehli dürdânedir 'âlemde
Fakr ehli kanâ'atle âzâde-i mihnetdir
'İzzetle gınâsında şâhânedir 'âlemde
Kudretle binâ olmuş bir beyt-i mu'allâdır
Hakk sırrına âgâh dil kâşânedir 'âlemde
Sabreyleyerek nâre nûr ile olan me'lûf
Cânânı bulur cânda pervânedir 'âlemde
Âfâkları ma'nâda enfüsde bulan âdem
Sâmî reh-i vahdetde bir dânedir 'âlemde
Şeyh Abdurrahmân Sâmî Saruhânî
Kaddesallahu Sırrahu'l-Âlî